Çelës për veri janë ndërkombëtarët!

Zëvendëskryeministri Hajredin Kuçi tha të mërkurën se çelësi i
zgjidhjes së çështjes së veriut të Kosovës dhe shtrirjes së Kushtetutës
edhe në atë pjesë qëndron te ndërkombëtarët. Kuçi në tre vjetorin e
miratimit të Kushtetutës së Kosovës ka thënë se ajo ka mundësuar
ndërtimin e institucioneve, bartjen e kompetencave nga ndërkombëtarët te
vendorët dhe krijimin e ligjeve demokratike.Ndërsa sa i
përket pjesës së veriut, ai tha se në atë pjesë ka mungesë të
mekanizmave. Kuçi tha se në veri qeveria ka qenë e kujdesshme që të mos e
tensionoj situatën, ndërkohë që sipas tij, çelësi i zgjidhjes së
çështjes së veriut qëndron te ndërkombëtarët.
Siç njofton RTK, zëvendëskryeministri Kuçi gjithashtu u është
përgjigjur edhe akuzave të liderit të Lëvizjes Vetëvendosje (Albin
Kurti) rreth privatizimit të ndërmarrjeve publike, por edhe
paralajmërimit për protestën e javës së ardhshme.
Ndryshe Qeveria e Kosovës në mbledhjen e radhës ka miratuar disa
projektligje, ndërkohë që ka paralajmëruar se shumë shpejtë do ta kalojë
edhe Ligjin për vlerat e Luftës së UÇK-së, kërkesë kjo edhe e një pjese
të veteranëve të kësaj kategorie që ka ditë që po qëndrojnë në grevë
para ndërtesës së ekzekutivit. /Telegrafi/