Rexhepi: Ndërkombëtarët ta lexojnë raportin për veri

Ministri i Punëve të Brendshme, Bajram Rexhepi ka një propozim
për misionarët ndërkombëtarë në Kosovë. Për të kuptuar mirë situatën në
veri, sipas Rexhepit ata duhet ta lexojnë raportin e Zyrës së
koordinatorit për zbatimin e strategjisë për veriun. Ministri
që njihet për kritikat e tij të shpeshta karshi qasjes që misionet
ndërkombëtare kanë për veriun e vendit, ka thënë se raporti i Zyrës së
koordinatorit Ylber Hysa është i plotë dhe tregon në detaje për gjendjen
në atë pjesë, shkruan Koha Ditore.
Megjithatë, ministri i Brendshëm nuk ka mundur të shpjegojë nëse
raporti do të përdoret si bazë për qasjen që Qeveria do të ketë për
veriun.
“Unë e kam marrë raportin dhe e kam analizuar. Gjërat aty janë të
faktuara, është raport serioz dhe i besueshëm. Shumicën e prezantimeve
aty, unë i kam ditur, sepse jam nga Mitrovica, por në raport janë të
sistemuara shumë mirë, dhe ka fakte në të. Raporti duhet të shërbejë më
shumë ndërkombëtarëve, të cilët duket se nuk kanë shumë informata. Aty
do të mund të mësojnë shumë për funksionimin e strukturave paralele dhe
ilegale”, ka thënë Rexhepi.
Ministri ka pranuar se strategjia për veriun, e hartuar vite më parë nga Qeveria e Kosovës dhe ICO-ja, po ngec.
Strategjia që kishte për qëllim që në veri të vendit të shtrihej
autoriteti i institucioneve të Kosovës dhe të bëhej zbatimi i Pakos së
Ahtisaarit, sipas ministrit nuk po ngec për shkak të mungesës së
informacioneve, por për arsye të tjera. /Telegrafi