KE publikon Raportin e progresit

Komisioni Evropian gjatë ditës pritet të publikojë Raportin e Progresit për vendet e Ballkanit Perëndimor, të cilat kanë synim anëtarësimin në Bashkimin Evropian.

Disa pjesë të projekt-raportit që kanë mundur të depërtojnë në media, flasin për tri shqetësime të BE-së për Kosovën, e ato janë: krimi i organizuar, korrupsioni dhe liria e shprehjes.

Në anën tjetër, nuk dihet nëse Kosova do të marrë dritën jeshile për fillimin e dialogut për vizat, ndërkohë që duket se do të ketë sërish ngecje në lidhjen e raporteve kontraktuale si dhe proceset tjera integruese, për shkak të mosnjohjes së Kosovës nga 5 vendet e BE-së.

Ndërkaq, Serbia është duke pritur që sot të marrë përgjigje në kërkesën e saj për statusin e kandidates për anëtarësim në BE.

Kohë më parë, kancelarja gjermane, Angela Merkel, gjatë vizitës në rajon, pati thënë se Serbia nuk do të duhej ta merrte as këtë status pa i normalizuar raportet me Kosovën dhe pa i shpërbërë strukturat paralele, transmetojnë mediat. /Telegrafi/