Më shumë kontribut për Raportin e Progresit

Bordi bashkërendues për sundimin e ligjit ka mbajtur takimin e
radhës në të cilin është diskutuar për projekt-ligjin për mbrojtjen e
dëshmitarëve, draftin e Kodit Penal, përgatitjet për një ligj anti-mafia
dhe zbatimin e mëtejshëm të ligjit për konfiskimin e aseteve.“Për
shkak të rrethanave, ne duhet të punojmë shumë, për të kursyer kohë sa
më shumë që të jetë e mundur dhe për të adresuar çështjet kryesore për
sundimin e ligjit që do të reflektohen në Raportin e Progresit të
Komisionit i cili do të dalë në fillim të vjeshtës”, ka thënë shefi i
EULEX-it, Xavier de Marnhac, i cili njëherësh është edhe bashkëkryesues i
këtij bordi. Ai tha se çështjet e legjislacionit që u diskutuan duhet
të zgjidhen sa më shpejt që të jetë e mundur.
Ndërsa zëvendëskryeministri, njëherësh ministri i Drejtësisë,
Hajredin Kuçi, ka vlerësuar angazhimet dhe veprimet e Qeverisë, EULEX-it
dhe KE-së gjatë periudhës në mes të dy takimeve në fushën e sundimit të
ligjit dhe është shprehur i gatshëm për bashkërendimin e aktiviteteve
edhe gjatë këtyre muajve, deri në shtator për të kontribuar për Raportin
e Progresit për Kosovën. “Puna në koordinimin e rendit dhe ligjit është
e përbashkët dhe me qëllim të funksionalizimit në tërë territorin e
Kosovës “, ka thënë Kuçi, i cili së bashku me shefin e EULEX-it
kryesojnë Bordi bashkërendues për sundimin e ligjit. /Telegrafi/