Pritet “dush i ftohtë” nga Raporti i Progresit

Ndryshimet e Ligjit për arsimin e lartë nuk kanë kaluar javën e shkuar në Qeveri, ndonëse ishin në agjendë të aprovoheshin. Në mbledhjen e kësaj jave ndryshimet nuk u përfshinë fare në rend dite.

Ministri i Arsimit, Ramë Buja ka shprehur një drojë të premten, se prolongimi i miratimit të ndryshimeve të ligjit mund të ketë pasoja për vendin, në raport me procesin e integrimeve.

“Ne, nëse nuk e realizojmë këtë gjë, që është në prag të realizimit, për ta çuar (ligjin v.j.) në Kuvend, së paku për ta bërë leximin e parë deri në shtator, do ta marrim atë ‘dushin e ftohtë’ nga Raporti i Progresit”, i ka thënë Kohës Ditore ministri Buja. “Për të mos e marrë, ne kemi përshpejtuar procedurën, në mënyrë që të mërkurën të shkojë në Qeveri dhe pastaj Qeveria ta procedojë shpejt në Kuvend”.

Raporti i Progresit që e nxjerr Komisioni Evropian, shpjegon shkurtimisht marrëdhëniet në mes të Kosovës dhe Bashkimit Evropian; analizon situatën politike sa i përket demokracisë, sundimit të ligjit, të drejtave të njeriut, mbrojtjes së minoriteteve dhe çështjeve rajonale; analizon situatën ekonomike; rishikon kapacitetin në implementimin e standardeve, që do të thotë, përafrimin gradual të legjislacionit dhe politikave me ato të acquis, sipas prioriteteve të Partneritetit Evropian. Bazuar në shkallën e progresit në këto fusha, Bashkimi Evropian vendos të nisë ose jo edhe dialogun për liberalizimin e vizave.
/Telegrafi/