Çitaku e pret me shqetësim Raportin e Progresit

Në fillim të sesionit vjeshtor, Kuvendi i Kosovës ka nisur të miratojë me procedurë të përshpejtuar një sërë ligjesh që janë identifikuar si prioritare nga zyrtarët e lartë të Komisionit Evropian. Megjithatë, ministrja e Integrimeve Evropiane, Vlora Çitaku, shpreh rezervat e saj për një vlerësim pozitiv të Komisionit në lidhje me përmbushjen e këtij kriteri, për shkak të, siç thotë ajo, vonesave të shkaktuara nga ana e ligjvënësve.

“Raporti i Progresit nuk mund të jetë më i mirë se realiteti, e realiteti është se ne kemi proceduar fare pak ligje. Ndonëse si qeveri i kemi proceduar në Kuvend të gjitha projektligjet, Raporti i Progresit identifikon si sukses jo punët në proces, por punët e kryera. Unë pres që në ditët e mbetura të gjitha institucionet e Republikës së Kosovës të rrisin dinamikën e punës, në mënyrë që të kemi një raport më pozitiv”, thotë për Radion Evropa e Lirë ministrja Çitaku.

Ajo thotë se kërkesat e identifikuara nga komisionari për zgjerim i Bashkimit Evropian, Stefan Fule, janë përmbushur nga Qeveria, por jo edhe nga institucionet tjera. “Të 21 ligjet prioritare që janë evidentuar nga komisionari Fule, janë në Parlament. Në do të shënohen si progres apo jo, varet nga angazhimi që do ta kenë deputetët e Republikës së Kosovës për t’i proceduar më tutje këto ligje. Shumë prej tyre janë në lexim të dytë, por ka edhe nga ato që janë në lexim të parë”, ka thënë ndër të tjera Çitaku. /Telegrafi/