Bullgaria shpreh shqetësim për Kosovën

Shefi i diplomacisë bullgare, Nikolay Mladenov, ka deklaruar se vendi i tij është i brengosur për shkak të tensioneve në rritje ditëve të fundit në veri të Kosovës. Ai u ka bërë thirrje Prishtinës dhe Beogradit të tregojnë maturi dhe shmangin rritjen e tensioneve.

“Kjo është e rëndësisë jetike për sigurinë, prosperitetin dhe së fundi, perspektivën evropiane të rajonit”, ka potencuar Mladenov në një deklaratë të shkruar. Ai ka vënë në pah rëndësinë e vazhdimit të dialogut konstruktiv dhe pragmatik.

“Bullgaria është e shqetësuar për rritjen e tensioneve ditëve të fundit. EULEX-i , që ka pranuar përgjegjësinë për vendosjen e ligjshmërisë nga UNMIK-u gjatë vitit 2008, po vepron në pajtim me mandatin dhe duhet të ndihmoj në jetësimin e marrëveshjes lidhur me vulat doganore, që është arritur në dialogun mes Prishtinës dhe Beogradit, me ndërmjetësimin e BE-së”, vlerëson Mladenov.

Sipas tij, që të zvogëlohen tensionet, Beogradi dhe Prishtina duhet të përmbahen nga aksionet dhe deklaratat që mund të rrezikojnë përparimin e shënuar. Ai ka thënë se Bullgaria përshëndet qasjen pragmatike të të dyja palëve gjatë dialogut. “Është me rëndësi që bisedimet të vazhdojnë në mënyrë të argumentuar dhe pragmatike”. /Telegrafi/