Kuçi e vlerëson si real raportin e DASH-it

Publikimi i Raportit të Departamentit Amerikan të Shtetit për gjendjen e të drejtave të njeriut në Kosovë gjatë vitit 2010, edhe këtë vit ishte kritik në fushën e drejtësisë, ku flitet për një mungesë të procesit të duhur gjyqësor, për ndërhyrjen dhe frikësim të medias nga zyrtarët publikë dhe për diskriminim dhe trafik të grave dhe vajzave, gjetje këto që përbëjnë një imazh negativ për Kosovën.
Mirëpo, sipas zëvendëskryeministrit dhe ministrit të Drejtësisë, Hajredin Kuçi, raporti është real dhe i përputhur në tërësi me prioritetet që kanë institucionet e Kosovës për sundim të rendit dhe ligjit.

Raport nuk i lë shumë hapësirë për t’u krenuar demokracisë së brishtë kosovare. Për korrupsionin thuhet se mbetet një problem serioz, ndërkaq edhe perceptimi për zyrtarë të korruptuar te popullata ka qenë i lartë. Këtu i bëhet edhe një kritikë qeverisë për mosluftimin dhe moszbatimin e ligjit, i cili parasheh ndëshkime për zyrtarët e korruptuar. Nuk kanë munguar kritikat edhe për zgjedhjet e dhjetorit ku është vlerësuar se ka pasur parregullsi serioze.

Në raport flitet edhe për strukturat paralele të Serbisë në Kosovë, ku thuhet se “qeveria serbe ka vazhduar me funksionimin e pasanksionuar të sistemit paralel të drejtësisë në enklavat e banuara me serbë dhe në komunat e banuara me shumicë serbe.

Raporti, po ashtu vlerëson se rreziqet e perceptuara dhe incidentet sporadike të dhunës dhe presioni, vazhdojnë të kufizojnë lirinë e lëvizjes së shqiptarëve të Kosovës në veri të vendit dhe të serbëve në pjesët tjera të vendit. /rtk/telegrafi/