Policia e Kosovës seriozisht ia mësyn veriut

Policia e Kosovës pritet t’ia mësyjë veriut në javë e tretë të majit. Atje synohet të goditen rrjetet kriminale në bazë të një plani operativ dhe të vendoset rendi dhe ligji.
Drejtori i përgjithshëm i Policisë së Kosovës, Reshat Maliqi, ka thënë për gazetën Express, se pas të enjtes pritet “të ketë diçka” për fillimin e veprimeve në këtë pjesë të vendit.
Fillimit të operacioneve të goditjes së krimit atje është duke i paraprirë një freskim i brendshëm i Policisë së Kosovës, e cila ka filluar disa ndryshime në hierarkinë e vet komanduese që kanë të bëjnë me këtë zonë problematike, e të dal jashtë kontrollit.
Këto ndryshime pritet të përfundojnë brenda pak ditëve, para se atje të nisin aksionet për goditjen e disa pikave të krimit të organizuar.
Burime të gazetës thonë se këto aksione nuk është e mundur të jenë shumë spektakolare, port ë jenë mjaft praktike.
Më shumë se dy vjet pritje të EULEX-it, veriut mbetet vrima e zezë e të këqija në Kosovës. Dhe, për ndryshim të situatës atje, Policia e Kosovës dhe Ministria e Punëve të Brendshme i kanë kërkuar EULEX-it një bashkëveprim në goditjen e disa pikave kyçe të krimit.
“Aktualisht nuk ka asgjë të re që pritet të ndodhë për ndonjë aksione të përbashkët ndërmjet EULEX-it dhe Policisë së Kosovës apo plan veprimi për veriun”, ka thënë për Express, James Nickolls, zëdhënës i EULEX-it. /Telegrafi/