Sparkes këshillon serbët të mos i përdorin targat e reja të Serbisë

Zëvendësshefi i EULEX-it, Andy Sparkes, i ka këshilluar banorët e veriut të Kosovës që, në mënyrë që t’i ikin konfrontimeve, t’i mbajnë targat e vjetra të Serbisë, ku janë të përfshira edhe qytetet e Kosovës.

“Duhet t’iu shmangemi konfrontimeve dhe konflikteve, pasi një gjë e tillë është e pakuptimtë. Këshilla ime do të ishte që të punoni siç keni punuar deri më tani dhe t’i japim një shans dialogut”, ka thënë Sparkes, duke shtuar se problemi i targave në veri të Kosovës ilustron gjendjen e komplikuar.

“Në një shoqëri normale, nuk presim që targat e automjeteve me një apo tjetër mbishkrim të jenë arsye për dhunë potenciale”, ka deklaruar Sparkes, raporton agjencia serbe e lajmeve “Tanjug”, njofton Zëri.

Reagimet e Sparkes erdhën pasi në veri të vendit filluan në masë të madhe të përdoreshin targat e reja të lëshuara nga Ministria e Punëve të Brendshme e Serbisë me shkurtesa të qyteteve të Kosovës.

Ministria e Punëve të Brendshme e Kosovës lejon përdorimin e targave të vjetra të Serbisë me shkurtesa të qyteteve të Kosovës, ndërsa policia e Kosovës ka marr urdhër që targat e reja të konfiskohen. /Telegrafi/