Lëvizja për Bashkim kërkon reciprocitet me Serbinë

– Duke iu referuar deklaratave të zyrtarëve të lartë serbë për ndarje të Kosovës, zëvendëskryeministri Hajredin Kuçi ka thënë pas mbledhjes së Qeverisë se kjo do të prodhonte efektin zinxhir të ndarjeve në rajon. Megjithëkëtë, ka thënë se vendet e Ballkanit Perëndimor nuk duhet të udhëhiqen nga kjo logjikë.
Më zëshëm është duke e proklamuar idenë e ndarjes vetë zëvendëskryeministri i Qeverisë së Serbisë, Ivica Daçiq. Ai ka përsëritur të mërkurën se nuk është reale që Kosova të mbetet pjesë e Serbisë dhe se ndarja është zgjidhje e problemit të statusit.
“Për Kosovën, logjika më e mirë është integrimi në Unionin Evropian, ku, ndër të tjera, do të ishin edhe zgjidhjet për entitetet që nuk jetojnë në shtete amë, që mund t’i quajmë”, ka thënë Kuçi.
Mirëpo në Kosovë ka një subjekt politik i përfaqësuar në Kuvend që e mbështet idenë e ndarjes. Lëvizja për Bashkim, që ka zënë 2 nga 120 ulëset e Kuvendit, konsideron se zgjidhja më e mirë për të mbërritur pajtimin Prishtinë-Beograd është që tri komunave të veriut të Kosovës të populluara kryesisht me serbë t’u jepet mundësia e deklarimit nëse duan t’i shkëputen Kosovës ose jo, sikur që e njëjta e drejtë t’u jepet edhe tri komunave me shumicë shqiptare që ndodhen në jug të Serbisë.
“Lëvizja për Bashkim konsideron se fushatës së Serbisë për ndarje të veriut Qeveria e Kosovës duhet t’i përgjigjet me reciprocitet me Kosovën Lindore. Pra, çfarëdo që Serbia të kërkojë për serbët e Leposaviqit, Zveçanit e Zubin-Potoku, edhe Kosova të kërkojë për shqiptarët e Preshevës, Bujanocit e Medvegjës”, thuhet në një komunikatë shtypi që ka lëshuar të mërkurën ky subjekt politik. “Pjesa veriore e Mitrovicës dhe fshatrat shqiptare përreth nuk mund të jenë pjesë as e bisedimeve, as e reciprocitetit. Atje është kryer spastrimi etnik i shqiptarëve dhe duhet së pari ata të kthehen në pronat e veta”.
Por, kundër kësaj dhe pro qëndrimit të Prishtinës zyrtare janë rreshtuar ambasadorët e vendeve që e kanë njohur pavarësinë e Kosovës.
Autoritetet kosovare dhe ato serbe kanë nisur këtë vit dialogun teknik në Bruksel. Deri tash nuk është arritur asnjë marrëveshje për çështjet që janë duke u diskutuar.