Ndarjes, me reciprocitet

Prishtina zyrtare duhet të mendojë seriozisht çështjen e
reciprocitetit në bisedime me Serbinë, thonë burime ndërkombëtare, duke
iu adresuar thirrjeve të shpeshtuara të zyrtarëve serbë për idenë e
ndarjes së Kosovës. Trendi i kësaj fushate diplomatike mund
të ndalet nga Prishtina vetëm nëse Qeveria dhe Parlamenti i Kosovës
tregojnë një vendosmëri për t’ua bërë me dije Serbisë dhe ndërmjetësve
në këtë dialog se gjithçka që Serbia mund të kërkojë për veriun, duhet
që në baza të reciprocitetit të vlejë edhe për Luginën e Preshevës,
vazhdojnë këto burime shkruan Zëri.
Kjo, sipas tyre, nuk nënkupton ndryshimin e kufijve, sepse Serbia sot
nuk shihet se ka një fuqi të tillë që njëanshëm të vendosë ndarjen e
Kosovës në tavolinën e bisedimeve. Për më shumë ndërlidhet me pozicionin
që, duke kërkuar maksimumin të nxjerrë një status të veçantë për veriun
e Kosovës, me një perspektivë të ndarje në vitet po edhe në dekadën e
ardhshme.
Andaj, në vend të insistimeve që dialogun politik ta trajtojë në
vazhdimësi vetëm si një dialog teknik, Prishtina zyrtare, sipas këtyre
burimeve, që në fakt paraqesin pikëpamje të një diplomati ndërkombëtar
në Prishtinë, duhet ta përdorë edhe kartën e reciprocitetit.
Çështja e reciprocitetit në bisedimet Kosovë-Serbi është përmendur në
disa raste edhe në Kuvendin e Kosovës. Përderisa në qëndrimet e
qeverisë ende nuk ka një pozicionim zyrtar, pos që hedhet poshtë opsioni
i ndarjes. /Telegrafi/