LB: Ndarjes duhet përgjigjur me reciprocitet

Lëvizja për Bashkim (LB) vlerësoi të mërkurën se zërat e fundit, si në skenën politike kombëtare, ashtu edhe në atë ndërkombëtare, për zgjidhje të ndryshme politike të raporteve Kosovë-Serbi, me theks të veçantë për çështjen e veriut të Kosovës dhe Kosovës Lindore, tregojnë qartazi për kotësinë e dialogut për zgjidhjen e çështjeve teknike në mes të Kosovës dhe Serbisë.
Sipas kësaj lëvizje fushata energjike e Serbisë për ndarje të Kosovës është përpjekje për imponimin e modelit serb për zgjidhjen e çështjes së veriut të Kosovës, ndërkaq sipas tyre mungesa e guximit, paaftësia dhe servilizmi i Qeverisë së Kosovës po i krijon terren të përshtatshëm depërtimit të kësaj fushate.

“Qeveria e Kosovës do të duhej që sa më shpejt që të jetë e mundur, në bashkëpunim me të gjitha forcat politike shqiptare në Kosovë dhe në Preshevë, Bujanoc e Medvegjë, të hartojë platformë kombëtare për zgjidhjen e çështjes shqiptare në Preshevë, Bujanoc e Medvegjë”, vlerësuan zyrtarë të kësaj lëvizje në një konferencë për media.

Sipas tyre, Qeveria e Kosovës do të duhej që menjëherë t’i ndërpresë bisedimet e pakuptimta teknike me Serbinë dhe ta trajtojë seriozisht problemin në veri të Kosovës, i cili po u kushton shumë shtrenjtë qytetarëve të saj.

Lëvizja për Bashkim deklaron se, në këto rrethana, zgjidhja më e mirë dhe më e drejtë edhe për veriun e Kosovës, edhe për Kosovën Lindore do të ishte zbatimi i të drejtave të barabarta për popullatën përkatëse si në Leposaviq, Zveçan e Zubin Potok, ashtu edhe në Preshevë, Bujanoc e Medvegjë.

“Lëvizja për Bashkim konsideron se fushatës së Serbisë për ndarje të veriut Qeveria e Kosovës duhet t’i përgjigjet me reciprocitet me Kosovën Lindore. Pra, çfarëdo që Serbia të kërkojë për serbët e Leposaviqit, Zveçanit e Zubin Potoku, edhe Kosova të kërkojë për shqiptarët e Preshevës, Bujanocit e Medvegjës”, thuhet në komunikatë.

Më tej theksohet se pjesa veriore e Mitrovicës dhe fshatrat shqiptare përreth nuk mund të jenë pjesë as e bisedimeve, as e reciprocitetit. “Atje është kryer spastrimi etnik i shqiptarëve dhe duhet së pari ata të kthehen në pronat e veta”, thuhet në komunikatë. /Telegrafi/