Gordon: Evropa s’është e plotë pa Ballkanin në BE

Qëndrimi i SHBA-së dhe i Evropës është se Evropa nuk do të jetë e plotë derisa të gjitha vendet e Ballkanit Perëndimor të mos bëhen anëtare të plota të Bashkimit Evropian, deklaroi ndihmësi i Sekretarit të Shtetit të SHBA-së për çështje euroaziatike, Philip Gordon.
Gordon ka thënë se SHBA janë konsultuar ngushtë me Evropën mbi “dialogun e Serbisë e të Kosovës, mbi të ardhmen e BeH, mbi rrugën e Kroacisë në BE”.

“Shkalla e tillë e pajtueshmërisë rreth Ballkanit është bazë e suksesit tonë – po bashkëpunojmë në çdo segment të rrugës. Diplomacia e përbashkët intensive gjatë muajve të shkuar tregoi sa janë të afërta e të ndërlidhura vizionet tona, që është vendimtare për progresin në rajon”, është shprehur Gordon në një raportim rreth prioriteteve të SHBA në Evropë, ka publikuar sajti i Departamentit të Shtetit, njoftojnë mediat.

Ai ka vlerësuar se uniteti i SHBA dhe i Evropës ka rëndësi të veçantë për Bosnjën, ku siç u shpreh ai “politikanët nacionalistë në papërgjegjësi po vënë në dyshim vetë ekzistimin e Marrëveshjes së Dejtonit dhe po rrezikojnë funksionimin dhe integritetin e shtetit”.

“Politikanët boshnjakë shpesh po vënë interesat e veta mbi ato të popullit të vet. Bosnja nuk mund të marrë vendin e vet të plotë në Evropë po s’pati shtet që do të ishte funksional në shkallë të mjaftueshme që t’u përgjigjet kërkesave për pranim në NATO e në BE. Ne me aleatët tanë evropianë kemi vendosur ta ndihmojmë Bosnjën që të përmbushë ato kërkesa”, është shprehur Gordon. /Telegrafi/