Vukcevic, shoku i Carla del Pontes

Kryeprokurori i Serbisë për Krime të Luftës, Vladimir Vukcevic, po tregohet më “i zoti” se EULEX-i, madje edhe më shumë se vetë Tribunali i Hagës. Ai pretendon se ka fakte të forta se UÇK-ja ka kryer trafikim organesh.
Vukcevic insiston se me këtë çështje duhet të merret Carla del Ponte. Këto prova thotë se do t’i publikojë së shpejti. Për këtë rast kërkon hetim të pavarur.
Duke mos pranuar intervistë direkte, por përmes postës elektronike, ai për Express ka thënë se për zbardhjen e autorëve të Masakrës së Dubravës kanë dy vjet që punojnë.
“Masakra e Dubravës është njëra ndër rastet më me prioritet për ne. Një krim i tmerrshëm, që duhet të ketë epilog gjyqësor. Jemi afër që ta zgjidhim në tërësi”, ka thënë Vukcevic.
I pyetur se pse Carla del Ponte është personi më i duhur për të bërë hetimet për gjoja trafikim organesh në Kosovës, Vukcevic ka thënë se ajo është profesionale, prokurore objektive di t’i rezistojë çdo trysnie të mundshme, i njeh rrethanat, rajonin dhe njerëzit. /Telegrafi/