Ish-pjesëtarë të UÇK-së hynë në grevë urie

Këshilli për mbrojtjen e të drejtave të luftëtarëve të ish-UÇK-së ka hyrë prej hënës mbrëma në grevë urie përballë ndërtesës së Qeverisë.
Më shumë se 30 grevistë janë mbledhur në një tendë, duke me kërkesën për përmirësimin e pozitës së veteranëve të luftës.

Kryetari i këtij këshilli, Xhevdet Qeriqi ka thënë se këtë greve më shumë po e bëjnë për arsye morale, duke mbrojtur vlerat e ish-luftëtarëve të UÇK së dhe se nuk do ta përfundojnë derisa të miratohet Ligji për vlerat e luftës.

“Ne për çështje morale do të hymë dhe do të kërkojmë që ligji për vlerat e luftës përfundimisht të miratohet nga Parlamenti i Kosovës, në të kundërtën nuk do të dalim nga greva, nëse është nevoja edhe një ose dy muaj do të vazhdojmë dhe nuk e kemi ndërmend të largohemi”, ka thënë Qeriqi për KTV-në.

Ndërsa lidhur me deklaratën e Organizatës së Veteranëve të Luftës së UÇK së, të cilët kanë njoftuar se nuk e mbështesin grevën, Qeriqi ka thënë se ata më shumë janë avokat të Qeverisë, se sa që mbrojnë të drejtat e veteranëve.

Sipas Qeriqit, greva ka për qëllim të tërheqë vërejtjen për trajtimin jo të mirë të ish-luftëtarëve nga ana e institucioneve vendore dhe ndërkombëtare në Kosovë.

Po ashtu grevistët janë shprehur kundër arrestimeve që EULEX-i po u bën bashkëluftëtarëve të tyre, ndërsa nuk arrestohen kriminelët serbë. /Telegrafi/