Shillova: Policia nuk është e ndikuar nga asnjë organizatë

Drejtori i hetimeve i Policisë e Kosovës, Riza Shillova tha të
martën se Policia e Kosovës nuk ndikohet nga SHIK-u, duke iu
kundërpërgjigjur deklaratave të mëhershme të kryetarit të Prishtinës,
Isa Mustafa. Shillova theksoi se mosndikimin e Policisë së Kosovës e
konfirmojnë edhe veprimet e EULEX-it për këtë çështje.Këto
komente i bëri pas një seminari të organizuar nga OSBE-ja, lidhur me
raportimin e krimit dhe korrupsionit, për t’iu kundërpërgjigjur akuzave
të Isa Mustafës i cili pati deklaruar se SHIK-u ka ndikuar të fillojnë
hetimet në komunën e Prishtinës.
Sipas drejtorit të hetimeve, jo vetëm SHIK-u, por asnjë organizatë nuk ndikon dhe nuk ka ndikuar në hetimet e Policisë.
Ai tha se policia punon në bazë të ligjit, dhe jo në bazë të presioneve që mund të ketë.
Sipas Shillovës deklaratat e tilla ishin të rënda në një kohë kur policia vazhdon të bëj hetimet në komunë.
Megjithatë, drejtori i hetimeve tha se veprimet e mëvonshme të
EULEX-it, që nuk e kanë marrë përsipër rastin e Komunës kanë vërtetuar
se policia nuk është ndikuar nga organizatat e ndryshme. /Telegrafi/