30 përqind e mjekëve ushtrojnë profesionin pa liçensë

Afro 30 përqind e mjekëve ushtrojnë profesionin pa liçensë dhe
në mënyrë arbitrare. Ky shqetësim është ngritur nga Institucioni i
Urdhërit të Mjekut dhe kostoja sipas presidentit të kësaj strukture
shëndetësore, Din Abazaj, lidhet drejtpërdrejtë me pacientin."Këta
mjekë që ushtrojnë profesionin në mënyrë të paliçensuar pas daljes së
këtyre akteve ligjore dhe nënligjore, janë në kundërshtim me ligjin dhe
nëse kryejnë një gabim mjekësor dhe paditen për këtë, në rradhë të parë
ndëshkohen sepse kanë ushtruar profesionin në kundërshtim me ligjin",
tha për AS, Din Abazaj, President i Urdhërit të Mjekut.
E njëjta situatë paraqitet dhe në sektorin dentar, pasi dhe shumë
stomatologë punojnë pa liçensë. Problematika është më e ndjeshme në
qendrat e mëdha spitalore të kryeqyetit dhe Abazaj akuzon drejtpërdrejtë
drejtuesit e spitaleve, që pranojnë mjekët pa lejen e ushtrimit të
profesionit. Ndërkohë, në sektorin privat nuk ka probleme të tilla.
"Ky është kryesisht për faj të drejtuesve të institucioneve që i
pranojnë në institucione dhe nuk i detyrojnë të paijsen me liçensë. Në
Tiranë kanë marrë leje vetëm mjekët që kalojnë në klinika private, sepse
ata nuk i pranojnë pa liçensë", tha Abazaj.
Urdhëri i mjekut është institucioni, që pajis me liçensë mjekët. Ndaj
edhe pse afati i parashikuar për të përfunduar ky proçes ka qenë tetori
i vitit të shkuar, Abazaj apelon që të gjithë bluzat e bardha të mos e
zhvlerësojnë liçensimin dhe të marrin këtë dokument ligjor./Telegrafi/