FSK e përgatitur të shërbejë në misione paqeruajtëse

Komandanti i KFOR-it, Erhard Buhler ka vlerësuar se Forca e
Sigurisë së Kosovës është e përgatitur që të shërbejë në misione të
ndryshme paqeruajtëse, në vende të ndryshme, sidomos në fushën e ndihmës
ndaj komunitetit si në fushën e shëndetësisë, deminimit të minave dhe
menaxhimin e mjeteve eksplozive. Ai po ashtu ka thënë se FSK-ja për një
kohë të shkurtër do të jetë e gatshme të shërbeje edhe në fusha të
tjera.Komandanti i KFOR-it, Erhard Buhler këto komente i ka
bërë para studentëve të Institutit për Studime Politike dhe Evropiane
(ISPE).
Buhler është shprehur shumë i kënaqur me zhvillimet e deritashme të
FSK-së në Kosovë dhe Ministrisë së FSK-së, të cilat i ka vlerësuar të
kenë qenë shumë pozitive dhe gjithashtu ka cekur bashkëpunimin shumë
pozitiv të tij me këtë strukturë.
Ai prezantoi strukturën e tanishme të pjesëtarëve të FSK-së, e cila
sipas tij është afër arritjes së strukturës së paraparë me Pakon e
Ahtisarit dhe theksoi se është i impresionuar me numrin shumë të madh të
kandidatëve të interesuar për t’u anëtarësuar në këtë strukturë.
Duke konsideruar imazhin e FSK-së si një aspekt të rëndësishëm,
Gjenerali ka shprehur gatishmërinë e KFOR-it dhe njëkohësisht angazhimin
e tyre që janë duke e bërë në lidhje me promovimin e një imazhi pozitiv
të FSK-së dhe Kosovës në përgjithësi në shtetet fqinje dhe tjera
evropiane. /Telegrafi/