KQZ e përgatitur për zgjedhjet në Rahovec

Komisioni Qendror i Zgjedhjeve (KQZ), në mbledhjen e radhës të mbajtur të enjten, ka njoftuar anëtarët e vet me aktivitetet e Sekretariatit në mes të dy takimeve, lidhur me përgatitjet rreth organizimit të zgjedhjeve të jashtëzakonshme për kryetar komune të Rahovecit, të cilat do të mbahen më datën 21 nëntor 2010, si dhe lidhur me zgjedhjet e jashtëzakonshme për Kuvendin e Republikës së Kosovës, të cilat do të mbahen më 12 dhjetor të këtij viti.
Sa i përket zgjedhjeve të jashtëzakonshme të Rahovecit, kryeshefi i SKQZ-së, Xhemajl Peqani, tha se të mërkurën që kaloi është bërë shpërndarja e materialit josensitiv, kurse të shtunën do të bëhet shpërndarja e materialit sensitiv.

Ndërsa sa i përket përgatitjeve për zgjedhjet për Kuvendin e Kosovës, kryeshefi i SKQZ-së tha se shumica e subjekteve politike kanë dorëzuar nominimet për komisionet e vendvotimeve (KVV) te Komisionet Komunale të Zgjedhjeve, ndërsa para datës 28 nëntor, sipas tij, KQZ-ja do të bëjë emërimin e tyre (përfshirë edhe anëtarët rezervë).

Zyra për Regjistrimin e Subjekteve Politike dhe Certifikim (ZRPP-ja), i rekomandoi KQZ-së akreditimin e 12 subjekteve politike për Zgjedhjet për Kuvendin e Republikës. Subjektet politike të rekomanduara nga Zyra për Certifikim janë: Partia Demokratike e Kosovës (PDK) me 110 kandidatë, koalicioni AKR-PD-PSD-PPI-PPK-PNDSH-PGJK me 110 kandidatë, Lidhja Demokratike e Dardanisë (LDD) me 110 kandidatë, Kosova Demokratik Turk Partisi (KDTP) me 48 kandidatë, koalicioni VAKAT me 39 kandidatë, Gradjanska Iniciativa Gore (GIG) me 6 kandidatë, Savez Nezavisni Socialdemokrata (SNSD) me 3 kandidatë, Serpska Kosovskometohijska Stranka (SKMS), me 35 kandidatë, Serpska Socialdemokratska Stranka (SSDS) me 48 kandidatë, Serpska Narodna Stranka (SNS) me 9 kandidatë, Gradjanska Inicijativa Krilo Naroda (GIKN) me 10 kandidatë, Jedinstvena Srpska Lista (JSL) me 56 kandidatë.

KQZ, miratoi rekomandimin e Zyrës dhe i certifikoi këto subjekte politike