LDK-ja në Rahovec kritikon PDK-në për mënyrën e fushatës

Dega e LDK-së në Rahovec, nëpërmjet një komunikate ka reaguar, siç thuhet, ndaj mënyrës së fushatës që po bënë PDK-ja në këtë komunë për zgjedhjet për kryetar të Rahovecit.
“Në komunën Rahovecit, po mbahet fushata parazgjedhore për kryetar komune. Duke parë zhvillimet e fundit që janë duke ndodhur, reagojmë për organizimet e ndryshme, pra fushata që janë duke organizuar partitë e tjera, e sidomos PDK-ja, e cila organizoi një darkë pune me arsimtarët, kinse për të diskutuar ligjin dhe arsimin në përgjithësi, e në fund u kërkohet vota për kandidatin për kryetarin e PDK-ës, nga ana e ministrit të arsimit Enver Hoxhaj”.

“Po ashtu, të premten janë thirrur bujqit e komunës së Rahovecit në Prishtinë, për të diskutuar për problemet me bujqit, ndërsa edhe atyre u kërkohet vota për kandidatin e PDK-së”.

“Këto darka e dreka kanë kushtuar mbi 40.000 euro, që janë paraqitur edhe në raportin financiar të komunës, pra për shpenzime për dreka e darka të Hashim Thaçit me ministra të tij, me grupe të ndryshme për interes të ngushtë partiak, dhe jo me grupe të ndryshme të qytetarëve dhe për brengat e tyre”.

“Kërkojmë nga të gjitha institucionet që të parandalohet kjo fushatë dhe kërkojmë veçanërisht të dënohet PDK-ja dhe liderët e saj, për keqpërdorim të mjeteve të qytetarëve për interes partiake, dhe sidomos për fushatë”, thuhet në reagimin e LDK-së së Rahovecit.