Kuçi: Nuk dua të jem pjesë e fushatës kundër UÇK-së

Zyrtari i lartë i AAK-së, Blerim Kuçi konsideron se gjithçka që
po flitet e po deklarohet kohëve të fundit nga disa individë është një
fushatë kundër UÇK-së dhe ndaj vlerave të luftës në përgjithësi.Në
një intervistë për Bota sot, i pyetur se si e arsyeton hapjen e temave
të luftës kohëve të fundit, Kuç ka thënë se është fushatë me disa
orientime.
“Së pari është orientimi prej Serbisë sepse po tentohet që të
krijohet një balans ndërmjet ushtrisë së Milosheviqit dhe UÇK-së që
është shumë e dëmshme. Pjesë e kësaj fushate janë edhe një pjese e
ndërkombëtareve, pra janë pjesë e këtij projekti kundër UÇK-së. Unë kam
shumëçka të flasë për Brigadën 123, komandant i të cilës kam qenë, por
në përgjithësi hapjen e debateve të tilla konsideroj si shumë të dëmshme
në këtë kohë të tashme dhe po ashtu edhe të ndjeshme. Unë edhe sot jam
në dilema se a duhet të flasë tash për gjithë historinë e Brigadës 123
që është një pjesë e ndritshme e UÇK-së, sepse kjo Brigadë ka numëruar
mbi dy mijë ushtarë”, ka thënë Kuçi.
Kuçi ka potencuar se km edhe “presionin” e ushtarëve të vet që të
flas të vërtetën e kohës së paraluftës e të luftës, por ka përmendur
arsyet e tij pse nuk është koha tash të flas.
“Në këtë sens ju kisha lut edhe juve si media që ta gjykojnë këtë
‘heshtje’ time në këtë prizëm. Por, konsideroj se do të vijë një moment i
caktuar pas kësaj fushatë që është duke u zhvilluar kundër vlerave të
UÇK-së, kur të kalojë kjo do të ishte mirë të ketë një debat së paku për
çështjen e aspekteve historike dhe të krijohet një debat, por tash për
tash është shumë e ndjeshme”, ka thënë ai. /Telegrafi/