Florit, italiani optimist

Kryetar i sapoemëruar i Asamblesë së Gjyqtarëve të EULEX-it, italiani Francesco Florit, ka thënë se çdo ditë është duke u forcuar sistemi i drejtësisë në Kosovës. Sipas tij, qytetarët duhet ta kuptojnë se EULEX-i nuk do të jetë gjithmonë këtu.
Në një intervistë për gazetën Express, Florit ka thënë se kosovarët duhet të jenë optimistë se situata do të ndryshojë.
“Paramendoni ku ka qenë vendi dhjetë vjet më parë dhe cilat janë përmirësimet për këtë kohë. Sfida që ngelet pastaj do të jetë ajo e abuzimit me drogë, ngase deri më tash, Kosova ka qenë vetëm një vend tranzit, kurse tash sikur po e zë një vend. Pra, probleme do të ketë, por të natyrave të ndryshme. Pika tjetër në këtë vizion është se njerëzit po bëhen gjithnjë e më të hapur nëpërmjet mediave, internetit dhe qasjes dhe ata po i kërkojnë të drejtat e tyre. Një prej dobësive aktuale në Kosovë është se shoqëria civile nuk është mjaftueshëm e angazhuar dhe se të drejtat e tyre, qytetarët nuk janë edukuar aq sa duhet për t’i kërkuar”, ka thënë Florit.
I pyetur nëse mund ta çojë deri në fund mandatin e vet, Florit ka thënë se do të jetë i fundit që do t’i fik dritat në EULEX. /Telegrafi/