Stefanovic optimist për zgjidhje kompromisi

Kryengeociatori serb i bisedimeve të drejtpërdrejta të Serbisë
dhe Kosovës, Borislav Stefanovic ka thënë të martën se në raundin e
katërt të bisedimeve me Prishtinën, mund të mbyllen temat si ato për
kadastrën, regjistrin civil dhe lëvizjen e lirë.“Jemi këtu
për të gjetur zgjidhjen dhe jam optimist se do të gjendet vendimi i
duhur që është i bazuar në kompromis. Ne duhet t’i zgjidhim disa nga
çështjet që tashmë janë hapur. Ne jemi të gatshëm dhe propozimet tona
janë shumë kreative”, ka thënë Stefanovic para takimit të së martës në
Bruksel, raportoi Evropa e Lirë.
Ai ka thënë se “ne respektojmë faktin se ne dhe Prishtina kemi
qëndrime krejtësisht të kundërta për statusin, por këto probleme duhet
të zgjidhen për të mirën e njerëzve”.
Ndërsa shefja e ekipit kosovar në bisedimet me Serbinë, Edita Tahiri
ka thënë se në raundin e katërt të bisedimeve që filloi sot mund të
priten rezultate në të paktën tri fusha.
“Rezultate substanciale në çështjet e dialogut presim në lëvizjen e
lirë, në tregtinë e lirë dhe në çështjet e energjisë. Këto janë tri
fusha të mëdha, ku të dy delegacionet kanë punuar me përkushtim dhe jemi
në një fazë ku në këto dy ditë do të dalë një kornizë e marrëveshjes
për këto tri çështje”, ka thënë Tahiri para fillimit të takimit.
Raundi i katërt i dialogut në mes të Kosovës dhe Serbisë po
zhvillohet si zakonisht me ndërmjetësim të përfaqësuesi të BE-së, Robet
Cooper.
Kësaj radhe do të diskutohen temat që tashmë kanë qenë pjesë e
dialogut gjatë tre raundeve të para, megjithatë, kësaj radhe, sipas
qeverisë së Kosovës, do të shtohen edhe temat e trashëgimisë kulturore
dhe zbardhja e fatit të të zhdukurve. /Telegrafi/