Dhuna nuk është zgjidhje

Pak çaste para se të mbajë një konferencë për medie, të paralajmëruar për orën 20, shefi i EULEX-it, Xavier de Marnhac, përmes një komunikate për medie, ka thënë se dënon fuqishëm dhunën që ndodhi në pjesën veriore të vendit kundër komunitetit ndërkombëtar dhe u ka bërë thirrje të gjithëve që të tregohen të përmbajtur dhe të veprojnë me përgjegjësi.

“Bashkimi Evropian sot më herët shprehu mbështetjen e plotë për përpjekjet e KFOR-it dhe EULEX për ta qetësuar situatën. Për më tepër, BE gjithashtu ka mbështetur heqjen e barrikadave pasi që ato pengojnë lëvizjen e lirë”, ka thënë Marnhac përmes një deklarate për media, duke shtuar se EULEX-i, edhe njëherë, duhet të theksojë se dhuna nuk është zgjidhje.

“Është me rëndësi që popullit të mbetet i qetë, të tregojë maturi dhe të veprojë me përgjegjësi. Është me rëndësi që njerëzit ta respektojnë sundimin e ligjit”, ka theksuar Marnhac.

Ndërkaq Marnhac, gjatë një intervistë për RTK-në, ka mohuar zërat se ka marr urdhër për të mos reaguar në veri të vendit gjatë ditës së sotme. “S’ka urdhra që të mos dërgohen atje. S’mund t’i dërgojmë njerëzit atje nëse nuk ka lëvizje të lirë. Hapat e parë janë që ta stabilizojmë lirinë e lëvizjes. Kjo gjendje nuk duhet të zgjasë pafundësisht”, ka thënë Marnhac. /Telegrafi/