Përshkallëzohet dhuna në Kirgiztan

Korrespondentët e BBC-së në Kirgiztan thonë se ka patur luftime të ashpra përreth qytetit Osh me të paktën 80 të vrarë dhe afër 1 mijë të plagosur.
Mijëra uzbekët etnikë janë larguar nga qyteti Osh në kërkim të sigurisë në qytete dhe fshatra të tjerë.

Një nga ata që u larguan nga qyteti - Madina - përshkroi për BBC-në se si grupe të armatosura të burrave kirgiz po kalonin me makinë nëpër qytet duke hapur zjarr mbi uzbekët.

Ajo tha se është shumë e rrezikshme për uzbekët që të shkojnë në Osh si dhe bëri thirrje për ndihmë.

Qeveria e përkohshme e Kirgiztanit u ka dhënë kompetenca forcave të veta të sigurisë për të qëlluar për vrasje në një përpjekje për të ndaluar luftimet etnike.

Një zëdhënës i qeverisë së përkohshme të Kirgiztanit, Farid Niyazov tha se dekreti për të qëlluar për vrasje ka përfshire mobilizimin e pjesshëm të vendit me rezervistë të ushtrisë.

Presidenti Kurmanbek Bakiyev, i cili u rrëzua nga pushteti në prill dhe tani jeton në Bjellorusi, ka mohuar njoftimet se ai është i përfshire në këto trazira - të cila kanë ringjallur frikën e paqëndrueshmërisë politike në rajon ku si Rusia ashtu dhe Shtetet e Bashkuara kanë baza ushtarake. /bbc/