Stefanovic paralajmëron zgjidhje për letërnjoftime e targa

Shefi i ekipit negociator të Serbisë, Borisllav Stefanovic ka paralajmëruar se në rundin e tretë të bisedimeve me Prishtinën, Beogradi do të ofrojë zgjidhje të reja që janë në funksion të përmirësimit të jetës dhe mbrojtjes së interesave të serbëve në Kosovë.
“Bëhet fjalë për tema që lidhen me përdorimin e letërnjoftimeve, targave dhe pasaportave që i japin institucionet e shtetit, siç është shprehur ai, të vetëshpallur të Kosovës. Ne do të japim propozime konkrete, dhe do të përpiqemi të jemi sa më konstruktivë, në mënyrë që disa nga këto çështje t’i zgjidhim me sukses”, citon agjencia serbe e lajmeve FoNet të ketë thënë Stefanovic për Radion ndërkombëtare të Serbisë.

Sipas fjalëve të tij, ekipi i Beogradit shkon në Bruksel me zgjidhje, të cilat me asgjë nuk do të cenojnë integritetin e shtetit të Serbisë dhe se do t’i përmbahet me saktësi Kushtetutës dhe rezolutave parlamentare, transmetojnë mediat në Kosovë. /Telegrafi/