Këshilli Drejtues i UP-së, i politizuar

Këshilli Drejtues i Universitetit të Prishtinës (UP) përbëhet nga militantë të PDK-së, familjarë që kanë të afërm në pushtet dhe këshilltarë politikë të Ministrisë së Arsimit dhe përgjithësi njerëz të ndërlidhur me politikën, publikisht apo në mënyrë sekrete.
Qeveria e Kosovës ka deklaruar disa herë autonominë e UP-së. Por, këto deklarata rezultuan se kanë mbetur vetëm fjalë. Përmes mekanizmave të saj, ekzekutivi ushtron të drejtë mbi UP-në dhe politikën e tij, dhe në këtë rast kjo realizohet përmes Këshillit Drejtues të këtij universiteti publik, shkruan Zëri.
Katër nga anëtarët aktualë të Këshillit Drejtues janë të deleguar nga Ministria e Arsimit, dhe pesë prej tyre nga UP-ja. Ministria e Arsimit ka deleguar Milazim Krasniqin, Nuri Bexhetin, Gani Dragushën dhe Agim Zogajn. Ndërsa Basri Qabriqi, Abdullah Aliu, Ilire Vinca, Njazi Ibrahimi dhe Marian Dema janë të deleguar nga UP-ja, që sipas shoqërisë civile, opozitës dhe analistëve, nuk mbesin mbrapa anëtarëve të ministrisë për nga politika. /Telegrafi/