Themelohet Këshilli për Planifikim Hapësinor i Republikës së Kosovës

Ministria e Mjedisit dhe Planifikimit Hapësinor (MMPH) njoftoi të enjten se është themeluar Këshilli për Planifikim Hapësinor i Republikës së Kosovës, me qëllim të sigurimit të kushteve për zhvillim të qëndrueshëm dhe të barabartë hapësinor.
Me këtë rast, ministri i Mjedisit dhe Planifikimit Hapësinor, Mahir Yagcilar tha se MMPH-ja ka ndërmarrë iniciativë për formimin e Këshillit për Planifikimi Hapësinor, si organ konsultativ i Qeverisë së Kosovës, me qëllim të sigurimit të kushteve për zhvillim të qëndrueshëm dhe të barabartë hapësinor të Kosovës, mbështetjes profesionale dhe shkencore të dokumenteve të planifikimit hapësinor dhe të dokumenteve tjera.

“Detyrat e Këshillit janë të përcaktuara me Ligjin për Planifikim Hapësinor”, tha Yagcilar, duke shtuar se për punët administrativo-teknike dhe çështje tjera lidhur me punën e Këshillit është përgjegjëse Qeveria.

Ndryshe, Qeveria e Republikës së Kosovs në një nga mbledhjet e saj ka aprovuar listën për formimin e Këshillit për Planifikim Hapësinor, me çka janë pjekur të gjitha kushtet në funksion të fuqizimit të planifikimit hapësinor të Kosovës.

Anëtarët e Këshillit janë: Ruzhdi Pllana, gjeograf, Ylber Vokshi, arkitekt, Ilir Gjinolli, arkitekt, Laura Kusari-Limaj, inxhiniere e ndërtimtarisë, Xhelal Llonçari, arkitekt, Dervish Qerreti, arkitekt dhe Adem Pajaziti, ekonomist.