Ministria e Shëndetësisë nënshkruan marrëveshje financiare pa e ditur koston

Ministria e Shëndetësisë ka ecur një hap më përpara sesa të gjitha institucionet e tjera të Kosovës, jo me ndonjë kreativit zhvillimor, por me nismën që në mënyrë të pavarur të rrisë koston e të ardhurave të punëtorëve shëndetësorë, jashtë Ligjit të Buxhetit.
Këtë gjë Ministra e ka finalizuar para dy ditësh, kur ka nënshkruar marrëveshje me Federatën e Sindikatave të Shëndetësisë (FSSHK) në nivel vendi, me të cilën pretendohen se po rregullohen dhe relaksohen marrëdhëniet mes punëdhënësit dhe punëmarrësit e këtij sektori, shkruan sot gazeta Koha Ditore.
Marrëveshja, e cila nga të dyja palët është quajtur “kontratë kolektive”, veç tjerash, në vete përmban edhe një kosto të lartë financiare, e cila duhet të implementohet në të ardhmen. Por, koston e saj askush nuk e di as Ministria dhe as përfaqësuesit e sindikatave, si palë nënshkruese të saj. Ndërsa, nuk dihet as burimi i mjeteve prej nga do të paguhen këto shtesa me rritje.
Blerim Syla, kryetar i FSSHK-së, i cili vetë e ka nënshkruar këtë marrëveshje në cilësinë e përfaqësuesit të punëtorëve, në një deklaratë për “Kohën Ditore” e ka pranuar se “kontrata kolektive” gjithsesi që përmban në vete një kosto financiare, shuma e së cilës nuk është definuar në kontratë dhe atë nuk e di as Sindikata dhe as Ministria.
I pyetur se nga cili burim do të paguhet rritja e të ardhurave mujore, e cila është vulosur me kontratë, Syla ka thënë se “kjo është punë e Ministrisë”.
Ndërsa kreu i Ministrisë, Ferid Agani, kur bëri marrëveshjen, ka thënë se “është kënaqësi që MSH-ja po prin në këtë aspekt dhe mund t’u shërbejmë edhe të tjerëve si shembull, me nënshkrimin e kontratës që rregullon marrëdhëniet midis punëdhënësve dhe punëmarrësve në sektorin e shëndetësisë në mënyrën më të mirë të mundshme”.