Policia e Sudanit intervistë hetimore Berishës

Pas aterrimit të detyrueshëm në shkretëtirat e Sudanit, James
Berisha bëri të ditur se gjatë mbajtjes në Polici ka kaluar nëpër
intervista hetimore, nënshkrime të shumta, procedura e maltretime gjatë
tërë ditës, me shumë pak ushqim dhe ujë.Ai përmes një
njoftimi për media bëri të ditur se aksidenti ka ndodhur në ditën e diel
pasdite, ndërkaq për shkak të pamundësisë së komunikimit, informatat
janë përcjellë pjesë-pjesë.
“Pas ngjarjes për me të cilën ju tani jeni të njoftuar, unë kam
qëndruar për disa orë në minierën ‘Hassai Mine’ nën përkujdesjen e
stafit të minierës. Ditën e diel, rreth orës 23:00 erdhi shërbimi
policor i Sudanit dhe më mori nga miniera, më dërgoi në fshatin më të
afërt, që ishte rreth 2 orë larg. Policia më mbajti deri ditën e hënë në
mbrëmje dhe më lëshuan vetëm pas intervenimit të z.Denis Baillargeon që
është drejtori i asaj miniere”, thuhet në njoftim.
Ai bëri të ditur se natën e kanë dërguar në një shtëpi të mbuluar me
lastër, ku temperaturat ishin tmerrësisht të larta. “I jam shumë
mirënjohës z.Baillargeon që më shpëtoi nga ai vend”, shprehet Berisha në
këtë njoftim.
Sipas tij, aeroplani është ende në shkretëtirë, në vendin e
aksidentin dhe është nën përkujdesjen e policisë. Grupi hetues nga
Aviacionit Civil i Sudanit janë duke ardhur prej Khartoum-it, dhe ata do
ta bëjnë analizën e aksidentit dhe do të marrin vendim se si do të
vazhdojmë më tutje.
Më tej Berisha shprehet se Baillargeon ka ofruar numër të
konsiderueshëm të pajisjeve të minierës dhe mjete të transportit, në
mënyrë që të mund ta sjellin aeroplanin deri afër minierës.
“Miniera posedon një pistë për aeroplanët e tyre dhe shpresoj që do
të mund të nisem nga kjo pistë pas rregullimit të aeroplanit.”, thuhet
në komunikatë /Telegrafi/