Franca mbështet procesin e njohjeve

Ministri i Punëve të Jashtme i Republikës së Kosovës, Enver
Hoxhaj gjatë vizitës zyrtare në Francë ka marrë premtime se Franca do të
vazhdojë të përkrah progresin dhe reformat, sidomos pas shpalljes së
pavarësisë së Kosovës.Hoxhaj është takuar me Jean–David Lévitte, këshilltar për Diplomaci i Presidentit të Francës, Nicolas Sarkozy.
Në emër të presidentit Sarkozy, Lévitte ka siguruar ministrin Hoxhaj
se Republika e Kosovës do të jetë gjithmonë në agjendën e Francës. Ai ka
shtuar se Franca përkrah progresin dhe reformat, sidomos pas shpalljes
së pavarësisë së Kosovës.
Ai po ashtu ka shprehur përkrahjen e Francës për shtimin dhe
përmbylljen e procesit të njohjeve të shtetit të Kosovës, si dhe për
realizimin e aspiratave për t’u integruar në Bashkimin Evropian.
Ministri Enver Hoxhaj, ka informuar Lévitte për reformat e brendshme,
për sundimin e ligjit, për dialogun teknik mes Republikës së Kosovës
dhe Republikës së Serbisë, si dhe për punën që po bëjnë autoritetet
kosovare për të përmbushur kriteret e liberalizimit të vizave.
Hoxha para shumë diplomatëve, profesorëve dhe akademikëve ka mbajtur
edhe një ligjëratë me titullin “Shtetndërtimi dhe perspektiva Evropiane e
Kosovës ”, në njërin nga Institutet më prestigjioze në Evropë–Institute
Français des Relations Internationales (IFRI).
“Vetëm intervenimi i jashtëm në kuptimin e diplomacisë, në kuptimin e
sigurimit të paqes ka qenë në gjendje të krijojë stabilitet politik në
Ballkan. Pa intervenimin nga jashtë, pa intervenimin edhe të Francës,
nuk do të kishte paqe në Ballkan”, ka theksuar Hoxhaj.
Duke folur për perspektivën evropiane të Kosovës, Hoxhaj ka thënë se
Kosova nuk mund të mbetet vendi i vetëm në Ballkan, që nuk e gëzon të
drejtën e lëvizjes së lirë.
Me ftesë të ministrit të Punëve të Jashtme të Republikës së Francës,
Alain Juppé, ministri i Punëve të Jashtme i Kosovës, Enver Hoxhaj, po
qëndron në një vizitë zyrtare në Francë. /Telegrafi/