Senatorët premtojnë përkrahjen e Francës

Ministri i Punëve të Brendshme, Bajram Rexhepi u takua të
premten me senatorët francezë, Jean Faure dhe Andre Vantomme, të
shoqëruar me ambasadorin e Francës në Kosovë, Jean-Francois Fitou. Ministri
Rexhepi i falënderoi senatorët dhe ambasadorin e Francës në Kosovë për
mbështetjen e dhënë nga shteti i Francës në të gjitha proceset nëpër të
cilat ka kaluar dhe po kalon Kosova.
“E konsiderojmë Francën si një vend mik që ka luajtur një rol mjaft
të rëndësishëm në procesin e njohjeve dhe të gjitha proceset tjera nëpër
të cilat ka kaluar Kosova”, tha ministri Rexhepi.

Ministri i Punëve të Brendshme tha po ashtu “Franca ka qenë dhe është
një ndër kontribuesit më të mëdhenj për sigurinë dhe çdo herë kemi
pasur bashkëpunim të mirë”.
Ndërkaq, senatorët francezë u interesuan për gjendjen e sigurisë në
Kosovë dhe garantuan vazhdimin e kontributit të shtetit të Francës në
sundimin e rendit dhe ligjit në Kosovë dhe luftimin e migrimit ilegal,
trafikimit me qenie njerëzore, trafikimit me narkotikë si dhe të gjitha
dukurive tjera negative. /Telegrafi/