“Bosët” e palëkundshëm të politikës

As aplikimi i sistemit zgjedhor me lista të hapura, ku kandidatët do të kenë mundësi të marrin votat drejtpërdrejt nga qytetarët, nuk ka zbehur fuqinë e madhe që kanë liderët brenda partisë. Këtë më së miri e kanë dëshmuar edhe zgjedhjet e fundit parlamentare të 2010-së, kur shumë kandidatë janë bërë deputetë falë mbështetjes që u ka dhënë atyre bosi i partisë.
Madje nuk kanë munguar as akuzat dhe kundërakuzat ndërmjet vetë kandidatëve të të njëjtit subjekt politik për vjedhje votash. Analistët politikë, ndërkaq, kanë thënë se janë listat e hapura pikërisht ato që u kanë dhënë edhe më shumë fuqi liderëve partiakë, shkruan Zëri.
Për më tepër, sipas tyre, janë pikërisht listat e hapura që u kanë mundësuar kryetarëve të partive që duke bërë presion te komisionerët gjithandej Kosovës, t’i bëjnë deputetë të preferuarit e tyre dhe t’i lënë anash “rebelët” e partisë.
Sipas tyre, fuqia e jashtëzakonshme e liderëve të partive kosovare buron nga mungesa e demokracisë brenda partive dhe nga fakti se liderët i konsiderojnë subjektet politike si prona të tyre. /Telegrafi/