Bisedime nuk do të jenë në disfavor të asnjërës palë

Përfaqësuesi special i Bashkimit Evropian në Kosovë, Fernando
Gentilini, ka deklaruar se bisedimet mes Kosovës dhe Serbisë kanë si
qëllim arritjen e një zgjidhjeje evropiane për të dyja vendet. Ai ka
thënë se këto bisedime nuk do të jenë në disfavor të asnjërës palë.
Sipas tij, ky dialog ka për qëllim eliminimin e pengesave në mes të të
dyja vendeve.“Mendoj të gjithë e dinë për çështjet për të
cilat po flasim dhe këto bisedime janë shumë transparente. Ne po
bisedojmë për gjërat që do të përmirësojnë jetën e njerëzve. Për
shembull, liria e lëvizjes që është temë e rëndësishme. Mendoj se
njerëzit do të ndihen më mirë nëse do të mund të udhëtojnë me dokumentet
e tyre, nëse do të mund të vozisin me lejet e tyre të vozitjes”, tha
Gentilini në një intervistë për RTK-në.
Për sa i përket çështjes së dhënies së Strategjisë për liberalizimin e
vizave nga ana e Komisionit Evropian, Gentilini theksoi se paraprakisht
duhet të përmbushen edhe disa kritere, duke thënë se Komisioni Evropian
nuk është duke vënë standarde të dyfishta për Kosovën në çështjen e
liberalizimit të vizave. /Telegrafi/