Komuna e Prishtinës jepe leje ndërtimi pavarësisht legalizimit

Vetëm në zonat ku tashmë janë planet rregulluese Komuna e
Prishtinës jep lejet për ndërtim. Po një gjë e tillë po evitohet në
zonat e vjetra të qytetit.Drejtoresha e urbanizmit, Luljeta
Sokoli, ka thënë për Radio Kosovën se kjo bëhet me qëllim të evitimit të
parregullsive. Ajo tha se fillimisht qartësohen të gjitha aspektet
pronësore.
“Lejet tani janë për lagje të reja, kryesisht për lagje ku janë të
mbuluara me plane rregulluese, për struktura të vjetra të qytetit vetëm
aty ku është e mundur, por po i ikim atyre rasteve sepse po kërkojmë që
të bëhet zgjidhje e përgjithshme dhe të mos kemi dallime favorizuese,
por të kemi zgjidhje të përbashkët për të gjithë. Është momenti i fundit
që të futemi edhe në rregull dhe të mendojmë dhe veprojmë konform
standardeve të kryeqyteteve të shteteve”, ka thënë Sokoli.
Ndërsa, Asociacioni i Arkitektëve të Kosovës thonë se shumica e
planeve rregullative nuk i plotësojnë kriteret minimale, por as ato
ligjore. Kjo, sipas kryetarit të këtij asociacioni, Valdet Osmani, e
vështirëson dhënien e lejeve në këtë gjendje aktuale që është
kryeqyteti.
“Kjo e ka vështirësuar shumë gjendjen aktuale në Komunën e Prishtinës
për dhënie të lejeve, pasi që ligji i ndërtimit nuk është respektuar
aspak, e po ashtu as ligji i planifikimit. Edhe kjo e shkakton krejt
këtë kaos që e kemi në Prishtinë”, ka thënë Osmani.
Lejet për ndërtim janë dhënë kryesisht për objekte kolektive, individuale, shoqërore dhe objekte ekonomike. /Telegrafi/