Nobelisti Ferid Murad e viziton Kosovën

Fituesi i çmimit Nobel për medicinë, Ferid Murad, me ftesë të
Universitetit Amerikan në Kosovë (AUK) të enjten, më 16 qershor, do të
vizitojë Kosovën.Gjatë kësaj vizite ai do të mbajë një
ligjëratë për studentët e AUK-ut dhe do të njihet më për së afërmi me
punën e këtij universiteti.
AUK ka propozuar dhe Presidenca e ka pranuar kërkesën që ai të
shpallet Qytetar Nderi i Republikës së Kosovës nga presidentja Atifete
Jahjaga.
Gjatë vizitës, Murad to të takohet edhe me personalitete të tjera në
Kosovë nga fusha e mjekësisë, shkencës, politikës dhe shoqëria civile.
Ferid Murad fitoi çmimin Nobel për medicinë në vitin 1998 me dy shkencëtarë të tjerë.
Ai tani është profesor në Universitetin George Washington dhe
udhëheqës i laboratorit të Biokimisë dhe Biologjisë Molekulare në këtë
universitet.
Gjatë karrierës së tij të bujshme, dr. Murad ka ligjëruar në disa nga
universitetet më të njohura amerikane dhe ka bërë punime
kërkimore-shkencore në disa nga qendrat më inovative amerikane.
Krahas Nënës Terezë, dr. Murad është i vetmi person me prejardhje shqiptare që ka fituar këtë çmim prestigjioz. /Telegrafi/