Kushtëzimi i Serbisë me Kosovën - gabim i madh i BE-së

Shefi i diplomacisë serbe, Vuk Jeremic ka thënë se do të ishte
një gabim i madh në këtë moment të kushtëzohen hapat e mëtejshëm të
Serbisë drejt anëtarësimit në BE me presione që i referohen dialogut me
Kosovën.“Serbia është shumë e përkushtuar të realizojë të
ardhmen e vet në BE, por nuk mund të pranojë koncesione në procesin e
dialogut që do të shkelte pozicionin kushtetues të shtetit tonë”, është
shprehur të hënën Jeremic para gazetarëve në Bratisllavë pas takimit me
shefin e diplomacisë sllovake, Mikulas Dzurinda, raportoi FoNet.
Sipas tij, do të ishte një gabim i madh të ngarkohet dialogu ndërmjet
Serbisë e Kosovës me çështje ekstreme ose të përshpejtohet pa ndonjë
arsye, kurse Serbia, sikundër edhe deri tash, është e gatshme edhe në të
ardhmen për kompromise racionale e të arsyeshme. /Telegrafi/