UNMIK-u shpenzon 40 milionë dollarë në vit

Misioni i Kombeve të Bashkuara në Kosovë, UNMIK, është devalvuar
deri në atë masë, sa që thuajse është harruar. Ekzistimin e tij
kosovarëve ua kujton vetëm shefi Lamberto Zannier, kur raporton çdo tre
muaj në Këshillin e Sigurimit të OKB-së, krahas ministrit të Punëve të
Jashtme të Kosovës.Por, edhe në këtë rast, roli i këtij
misioni, e në mënyrë të veçantë i Përfaqësuesit Special të Sekretarit të
Përgjithshëm në Kosovë, që për nëntë vjet ishte gjithçka, tashmë është
pa ndikim.
Kjo vërehet edhe nga pjesëtarët e UNMIK-ut që kanë mbetur, e të cilët
nëse mblidhen bashkë, nuk janë më shumë sesa nëpunësit e dy ministrive
të Qeverisë së Kosovës.
Nga mijëra pjesëtarë që ky mision numëronte që nga vendosja e tij në
qershor 1999, tashmë kanë mbetur vetëm disa veta. Madje, shifra është
shumë simbolike, kur kuptohet se në të bën pjesë edhe stafi i zyrave
ndërlidhëse të UNIMK-ut në Shkup e Beograd.
Kështu, sipas të dhënave zyrtare të UNMIK-ut, aktualisht ky mision ka
vetëm tetë ushtarë dhe tetë policë. Kaq sa për pjesën ushtarake e
policore. Këtyre 16 personave u shtohen edhe 147 zyrtarë që bëjnë pjesë
në staf ndërkombëtar, 236 të tjerë vendorë, që bashkë edhe me 28
vullnetarë bëjnë 418 veta. Por ky mision brenda vitit shpenzon më shumë
se 40 milionë dollarë. /Telegrafi