Qeveria shpenzon buxhetin për kabinetet e ministrave

Qeveria e Kosovës po dëmton buxhetin e shtetit me shpenzimet enorme për kabinetet e ministrave, zëvendësministrave dhe të stafit teknik, vlerëson Lidhja Demokratike e Kosovës (LDK).

“Ministria e Arsimit, Shkencës dhe Teknologjisë, e vendor në një objekt tepër luksoz, përpos ministrit Ramë Buja dhe kabinetit të tij, ka edhe tre zëvendësministra, secili i shoqëruar nga stafi politik e teknik”, thuhet në komunikatën e LDK-së.

“Kjo përbën një ngarkesë të madhe e të panevojshme për buxhetin e Ministrisë, aq më tepër kur dihet se kësaj Ministrie viteve të fundit i është zvogëluar buxheti në mënyrë të vazhdueshme, në raport me brutoproduktin vendor”.

Lidhja Demokratike e Kosovës vlerëson se kjo Ministri po shpenzon kot dhe nuk po zhvillon asnjë aktivitet për t’u shënuar. Që nga fillimi i këtij mandati, sipas LDK-së, Ministria e Arsimit, Shkencës dhe Teknologjisë nuk ka shënuar asnjë rezultat.

“Lidhja Demokratike Kosovës vlerëson se Qeveria edhe në këtë rast ka punuar për interesat e veta, ka akomoduar njerëzit e vet në institucione, paguan ata pa bërë asnjë punë dhe ata shpenzojnë paratë e qytetarëve të Kosovës”, thuhet në komunikatë.

Partia më e madhe opozitare akuzoi të hënën edhe Ministrinë e Kulturës për rishpallja të konkursit, siç tha ajo, joligjor për pozicionet: Drejtor i Qendrës Kinematografike të Kosovës, Drejtor Artistik i Teatrit Kombëtar të Kosovës dhe Drejtor i Filarmonisë së Kosovës. /Telegrafi/