Gazetarët ministrave: Bëhuni më të përgjegjshëm

Asociacioni i Gazetarëve Profesionistë të Kosovës (AGPK) me shqetësim ka marrë lajmin se ministri i Punëve të Brendshme Bajram Rexhepi ka vendosur që të ndërpresë bashkëpunimin me të përditshmen “Zëri”.

Në një komunikimin që ka pasur me gazetën, ministri Rexhepi ka thënë se që nga 21 gushti i vitit 2011 e deri më 21 gusht të vitit 2012 ka shkëputur të gjitha raportet me gazetën “Zëri”. “Unë kam vendosur ta bëj një gjë të tillë. Edhe pse jam ministër është e drejte e ime të flas apo të mos flas me ju”, ka thënë Rexhepi.

AGPK përkujton se sjellja e ministrit Rexhepi nuk është e para në kabinetin Thaçi. Edhe zëvendëskryeministrja Mimoza Kusari-Lila pati vepruar njëjtë. Për AGPK-në veprimet e tilla të zyrtarëve qeveritarë janë të papërgjegjshme, të papranueshme dhe dëmtojnë rëndë lirinë e medies. Ministrat, dhe asnjë zyrtarë tjetër shtetëror nuk mund të jenë shpërfillës ndaj kërkesës së medieve për të marrë qëndrimet e tyre, përderisa të njëjtit ushtrojnë një funksion me përgjegjësi publike.

AGPK i rikujton kryeministrit Hashim Thaçi se mungesa e një zëdhënësi të qeverisë po e rëndon çdo ditë punën e gazetarëve. AGPK i rikujton institucioneve të Kosovës se shqetësimet e tilla do të raportohen edhe në mekanizmat ndërkombëtarë siç është Komisioni Evropian. AGPK i fton mediet dhe gazetarët që të vazhdojnë të bëjnë punën e tyre duke respektuar kodin etik dhe standardin profesional. /Telegrafi/