Stafi i Pacollit: Presidenca ka shpenzuar 66.742 euro

Burime të Telegrafit kanë siguruar një letër në të cilën Zyra e
ish presidentit Behgjet Pacolli i ka dërguar sekretarit të përgjithshëm
të Presidencës, Fahri Breznica me ç’rast mohon shumën e shpenzuar nga
Presidenca, gjatë periudhës kur Behgjet Pacolli ishte në krye të vendit.
Sipas stafit të Pacollit, Presidenca për atë periudhë kohore ka
shpenzuar 66.742.05 euro.Mediat kishin raportuar se në kohën
sa Pacolli ishte president, Presidenca kishte shpenzuar 214.221.00
euro, mirëpo sipas stafit të ish presidentit, shpenzimet totale të
Presidencës janë 66.742.05 euro dhe jo siç është raportuar.
Në letrën drejtuar sekretarit të përgjithshëm të Presidencës, thuhet
se Pacolli nuk ka harxhuar për periudhën 23.02.2011–28.04.2011, 214 221
euro, si kanë raportuar mediat, por gati tre herë e gjysmë më pak.
“Shpenzimet në total të Presidencës Pacolli, për kryerjen e detyrave
dhe angazhimeve voluminoze të tij janë 66.742,05 euro”, thuhet në letrën
e dërguar në Presidencë.
Sipas stafit të Pacollit, totali i shpenzimeve të presidentit Behgjet
Pacolli është 7.710.74 euro, ndërkaq shpenzimet e stafit politik janë
25.230.45 euro.
Ndërkaq, për renovime, karburante, etj janë shpenzuar 33.800.86 euro.
Në kuadër të kësaj shume për derivate të makinave zyrtare janë
shpenzuar 8.684 euro, ndërkaq vetëm për vizitat shtetërore në Shqipëri
dhe Maqedoni janë shpenzuar 10071.30 euro.
Megjithatë ditë më parë mediat kanë raportuar se Presidenca e Kosovës
ka bërë shpenzime më të mëdha gjatë kohës derisa në krye të saj ishte
biznesmeni Bhegjet Pacolli sesa në periudhën e njëjtë të vitit paraprak,
kur në vend të tij ishte Fatmir Sejdiu.
Kostoja e përafërt e faturave që i referon periudhës prej 22 shkurtit
deri më 30 mars të këtij viti, mediat kishin raportuar se është 214 221
euro, kurse në periudhën e ngjashme të vitit të kaluar ishte 177 610
euro. /Telegrafi/