KQZ nis procedurën e hapjes së kutive

Komisioni Qendror i Zgjedhjeve ka nisur procedurën e hapjes se kutive në orën 17:25 minuta, pas miratimit të projekt-aktit me shumice të thjeshtë.

Sipas projekt-aktit të miratuar, numërimi i votave të hedhura në kutinë e gabuar bëhet nga tetë grupe numërimi, në tryeza të posaçme të vendosura në sallën e mbledhjeve të KQZ dhe në sy të vëzhguesve të dy koalicioneve dhe anëtarëve të komisionit.

Rinumërimi nisi me kutitë e njësisë bashkiake nr. 1 ose KZAZ 45 për të vijuar më pas me kutitë e KZAZ-ve të tjera. Sipas rendit rritës. Secili grup numërimi do të ketë nga dy anëtarë që i përkasin administratës së KQZ- së dhe do të hapë katër kutitë e të njëjtës qendër votimi.

Sipas kreut të KQZ-së, Arben Ristani, votat e gjetura në kutinë e gabuar do të kërkohen në zarfin e fletëve të kontestuara në secilën kuti, do të numërohen dhe rivlerësohen nga grupet e numërimit, dhe para se të tabulohen do t’i njoftohen KQZ-së, për t’i pasqyruar në tabelë.

Përfaqësuesi i PS-së, Genc Gjoncaj ka deklaruar se vëzhguesit e PS-së janë njoftuar të ngrëne dorën për çdo rast kontestimi që do të hasin gjatë punës, ndërkohë që ka kërkuar që ata vetë të lëvizin për të ndjekur nga afër procesin. Kjo gjë është pranuar edhe nga kryetari i KQZ-së z. Ristani, raportoi Panorama./Telegrafi/