Feith i "befasuar" me hetimin

Zëdhënësi i ICO-s, Andy McGuffie tha të hënën se Përfaqësuesi
Civil Ndërkombëtar ishte mjaft i befasuar kur dëgjoi për herë të parë
për supozimin për një hetim dhe menjëherë kërkoi sqarim nga Shefi i
Misionit të EULEX-it dhe zinxhiri i tij komandues si dhe nga autoritetet
gjyqësore të Kosovës.
Pas raportimit në media se në regjistrat e Prokurorisë
Speciale, Pieter Feith figuron si një nga njerëzit që është hetuar nga
prokurorë të EULEX-it lidhur me zgjedhjen e guvernatorit të Bankës
Qendrore të Kosovës, ICO shprehet “Përfaqësuesi Civil Ndërkombëtar (ICR)
ishte mjaft i befasuar kur dëgjoi për herë të parë për supozimin për
një hetim".
Mirëpo, më tej thuhet në komunikatë se Feith menjëherë ka kërkuar
sqarim nga shefi i Misionit të EULEX-it dhe zinxhiri i tij komandues si
dhe nga autoritetet gjyqësore të Kosovës.
"Duhet mbajtur në mend se Përfaqësuesi Civil Ndërkombëtar në bazë të
Kushtetutës e ka autoritetin për dhënien e pëlqimit për emërimin e
Guvernatorit të Bankës Qendrore. Ai e ka ushtruar ketë autoritet duke
respektuar plotësisht kuadrin ligjor të Republikës së Kosovës si dhe
PGJS-në dhe do të vazhdoj të bëj këtë”, thuhet në reagim. /Telegrafi/