Republika Çeke, qeveri e qendrës së djathtë

Në Republikën Çeke formohet një qeveri e qendrës së djathtë, pasi tre partitë që dolën në krye në zgjedhjet e javës së kaluar ranë dakord të formojnë një qeveri koalicioni.
Partia konservatore e Demokracisë Civile hyn në koalicion me partinë e re konservatore, TOP 09 dhe partinë centriste të Çështjeve Publike për të formuar qeverinë e re çeke.

Marrëveshja i jep koalicionit një shumicë prej 118 vendesh në parlamentin prej 200 vendesh të Republikës Çeke.

Zyra Çeke e Statistikave tha të shtunën se Partia e Demokracisë Civile fitoi vetëm 20 për qind të votave, TOP 09 rreth 17 për qind dhe Partia e Çështjeve Publike vetëm 11 për qind.

Përafërsisht 63 për qind e çekëve morën pjesë në votimet dy ditëshe të javës së kaluar. Fushata u dominua nga çështja e deficitit buxhetor të vendit. /VoA/