Serbia pranon vetëm vulat pa “Republika...”

Shefi i ekipit negociator të Serbisë me Kosovën, Borisllav Stefanoviq ka deklaruar se për Serbinë janë të pranueshme vetëm ato zgjidhje për vulat doganore, të cilat janë “krejtësisht neutrale në pikëpamje statusore”, përkatësisht për Beogradin nuk është e pranueshme që në vulë të shkruaj “Republika e Kosovës”, ose të ketë stemën e Kosovës.

Dokumentacioni përcjellës, po ashtu duhet të jetë në aspektin statusor neutral, i ka thënë Stefanoviq gazetës “Politika”.

Ai nuk ka dashur të komentojë spekulimet se Serbia do të ishte e gatshme të pranojë zgjidhjet që do të parashihnin dy lloje vulash, në njërën sosh të shkruante “Dogana e Kosovës” ose Dogana Pejë, Mitrovicë, Prishtinë”, e në tjetrën “UNMIK – shërbimi doganor Kosovo”, ose “EULEX – shërbimi doganor Kosovo”.