Bosnja pranon vulat doganore të Kosovës

Dje pasdite Presidenca e Bosnjë dhe Hercegovinës ka aprovuar propozimin e qeverisë së saj për pranimin e vulave doganore të Kosovës, thuhet në komunikatën e Ministrisë së Tregtisë dhe Industrisë.

Pranimi i vulave nga ana e BeH vjen pas takimeve të javës së kaluar ndërmjet zyrtarëve të MTI-së së Kosovës dhe zyrtarëve përgjegjës nga Ministria e Tregtisë së Jashtme dhe Marrëdhënieve Ekonomike të BeH, në kuadër të takimeve të CEFTA-s në Bruksel.
Bosnja e Hercegovina deri më tani ka aplikuar taksën doganore prej 10 për qind për produktet kosovare, ndërkaq me aplikimin e vendimit të Qeverisë së Kosovës për masat e reciprocitetit edhe me këtë vend, ka ndikuar që institucionet e BeH të marrin vendim për njohjen e vulave doganore të Kosovës.
Duke pasuar këtë vendim shumë shpejt MTI-ja do të leshojë vendimin për heqjen e masës së reciprocitetit edhe me shtetin e Bosnjë e Hercegovineës. /Telegrafi/