Stefanovic: Nuk do t’i pranojmë vulat e shtetit të Kosovës

Shefi i ekipit serb për bisedime me Prishtinën, Borislav Stefanovic, ka thënë se vulat e Kosovës nuk duhet të kenë atribute të shtetësisë dhe që në aspektin e statusit duhet të jenë neutrale.
Stefanovic nuk ka dashur të komentojë shkrimet në mediat e Beogradit për propozimin e ri serb që në kufijtë me Kosovën të aplikohen vulat e dyfishta, duke thënë se propozimi i Qeverisë së Serbisë do të njihet në fillim të muajit të ardhshëm.

“Do të shohim në fillim të shtatorit se çfarë zgjidhje do të gjejmë. Në çdo rast, ajo nuk do të nënkuptoj që vulat të ketë atribute të shtetësisë së Kosovës dhe dokumentacioni përcjellës duhet të jetë neutral në aspektin e statusit”, ka thënë Stefanovic për agjencinë “Beta”.

I pyetur për marrëveshjen me KFOR-in, ai ka thënë se momentalisht “është në rregull”.

“Natyrisht, ka disa probleme në zbatim, por kjo punë tash po jep rezultat, kështu që mund të futemi në dialog”, ka thënë ai duke shtuar se serbët e Kosovës “kanë arsye të kenë frikë nga presioni i organeve të Kosovës dhe shtrimit të ndikimit të Prishtinës”.

“Prishtina do të vazhdoj ta provoj këtë, ndërsa ne duhet që të sigurojmë edhe qarqet ndërkombëtare e edhe praninë tonë që ta ndalojmë këtë”. /Telegrafi/