Franca po lobon për njohje të reja të shtetit të Kosovës

“Shumë shpejt presim njohje të reja për Kosovën”, ka deklaruar ambasadori francez në Prishtinë, Jean-François Fitou, i cili ka pranuar tërthorazi se njohjet e fundit që i kanë ardhur Kosovës janë meritë edhe e Francës. “Njohjet e fundit nuk më befasojnë. Rrota e njohjeve shkon vetëm në një drejtim. Do të ketë edhe shumë njohje të reja, e jo më pak”.

“E di që Qeveria e Kosovës është duke punuar shumë që të marrë sa më shumë njohje dhe se të gjithë miqtë e Kosovës, përfshirë këtu edhe Qeverinë time jemi duke dhënë kontribut në këtë drejtim. Ndonjëherë na shpaguhet e ndonjëherë na duhet të presim. Natyrisht që ne jemi duke lobuar edhe për njohje të reja, jemi duke ë bërë këtë me vjet të tëra”, ka thënë Fitou për Radio Dukagjinin.

Ambasadori Fitou është shprehur optimist se shpejt Kosova do të marrë edhe njohje të reja. “Ne jemi duke ndihmuar dhe mbështetur përpjekjet e Qeverisë së Kosovës për të shtuar numrin e njohjeve dhe jemi shumë të lumtur kur kjo mbështetje na shpaguhet. Shpresoj shumë se së shpejti do të kemi njohje të reja”, ka deklaruar ambasadori francez.

Javën e kaluar, tri ish koloni të Francës, Guinea, Nigeri dhe Benini e kanë njohur pavarësinë e Kosovës. Ndërkohë analistët vlerësojnë se fërkimet ndërmjet Ministrisë së Jashtme të Kosovës dhe zëvendëskryeministrit të parë të Kosovës, Behgjet Pacolli, lidhur me meritat për njohjet e fundit të Kosovës, janë krejtësisht të panevojshme dhe të dëmshme për Kosovën. /Telegrafi/