Integrimi nën “hijen” e krizave

Agjenda evropiane, që së paku në letër figuron si prioritet i
Qeverisë së Kosovës, është “shkelur” nga agjenda ditore e ekzekutivit, e
cila kryesisht ka të bëjë me probleme të natyrës “teknike”.Përballja,
pothuajse e përditshme me probleme të ndryshme, si raportet me Fondin
Monetar Ndërkombëtar dhe prishja e marrëveshjes me të, pingpongu me
pagat, emërimi i zëvendësministrave pas një vonese tremujore, raportet
ndërkombëtare negative, etj, janë disa nga çështjet me të cilat
ekzekutivi e ka shpenzuar energjinë, shkruan gazeta Zëri.
Të ndodhur në këtë situatë, drejtuesit e qeverisë kohën e fundit, pak
kohë para se Kosova të marrë Raportin e Progresit, kanë nisur t’i
vizitojnë udhëheqësit e komunave të vendit, nga të cilët kërkojnë që të
punohet sa më shumë që Kosova të përparojë në raport me integrimet
evropiane.
Aktivitetit të nisur nga ministrja e Integrimeve, Vlora Çitaku para
dy ditëve i ka dhënë “vulë” kryeministri Thaçi, i cili ka shfrytëzuar
datëlindjen e dhjetë të Asociacionit të Komunave të Kosovës, ku kanë
qenë pothuajse të gjithë kryetarët e komunave, që të bëjë thirrje për
përmbushje të standardeve për integrime evropiane.
Ministrja Çitaku, thotë se nuk ka dyshim që procesi i stërzgjatur
elektoral dhe kriza institucionale, e cila fillojë me dorëheqjen e
ish-presidentit Fatmir Sejdiu dhe vazhdojë disa muaj, periudhë kjo gjatë
së cilës kuvendi ishte në “pushim të dhunshëm” kanë ndikuar në
ngadalësimin e dinamikës së përmbushjes së agjendës evropiane dhe
reformave të parapara.
Ajo megjithatë thotë se qeveria është duke punuar “ditë e natë” që ta
përmbushë agjendën në fjalë, ndërsa shprehet e sigurt se Kosova është
brenda kornizës së kësaj agjende. /Telegraf